開心年三十晚

今日過左一個好耐都無咁開心嘅年三十晚呀，hee hee，Today is a nice day.
今日一早就訓到 12:00 左右喇，尋晚好夜先訓呀，因為要燒碟今日俾人，要燒好多隻，每隻平均十幾分鐘左右喇。原本話 1:15pm 係深水埗等嘅，但係就成 1:35pm 先到
無計喇，因為唔知幾時先會再見到佢地，所以遲少少都無計。
係喎，未講今日約左邊個添，今日約左 Fanny 佢地。因為今日係 Fanny 生日呀。咁我地原本打算係西九龍中心嘅一日日本野食壽司，不過果間野竟然年三十就收爐，所以就去左飲茶。
不過帶位果個知客，服務態度真係好差，佢講話五位同七位跟住入去(仲有另一批人都係度等緊位)，不過我見其他人好似想再睇睇第二間先，所以無跟住入去，後尾最後都係決定係返呢間算喇，唔再搵。咁個知客出返黎竟然話我…..無跟住佢入去(語氣好差)。Katy 佢地原本想走人嘅，不過算喇，佢地都好似幾肚餓下，唔理咁多食左先喇。因為我地係下午茶時間，所以都食得幾平下，每人 $35 就可以了。
hee hee，今日終於見到 Katy 個男朋友喇，似乎都唔錯喇，幾 nice，個樣都 ok，起碼好過我先喇 (其實都無咩人會差過我家喇，ha ha)。Christy 今日送左個公仔俾我呀，都幾得意幾靚下家，hee hee, thx her very much.

之後就一行六人就一齊行旺角，佢地有啲野要影印，帶左佢地去中旅社果頭後，就約返我細佬，因為要幫佢手買手提電話。佢個 no 原本係我嘅名，依家出新機轉台順便轉埋名。所以一定要我在場。同佢搞掂後，我就再會合返 Kitty 佢地(旺角中心)，佢地係度買野，咁佢地買完嘅野就梗係我幫佢地拎喇，hee hee(不過 Katy 除外)。
後尾 Crystal 黎埋，一齊睇多一陣野就去影貼紙相喇。依家的貼紙相機真係………..越出越多花臣，我好多時都覺得係大開眼界，ha ha，越黎越覺得自己老喇。
最後 Kitty、Katy & her bf、Anna 都走人喇，因為要食團年飯。咁 Crystal、Fanny、Christy 就想行行花園街，原本我都打算跟住去埋嘅，但係諗諗下，算喇，前日先同 Mandy 行過，唔想再行多次，所以我都走埋人。
咁我就去睇我嘅 head-phone 喇，不過係友誠度睇唔到有 arm 款呀，佢果度最平嘅 5.1 head-phone 都超過一千銀。所以我又落返深水埗買………..不過果下已經太遲喇(8:05pm)，原本黃金呢個時間應該未關嘅，不過今日年三十晚，大部份都關左……就連埋我想買 head-phone 果間都關埋…..算喇，我同個 head-phone 都係無咩緣….
跟住我又返去旺角，約 Envy & her bf，佢地都好似相處得唔錯咁喇。Envy’s bf 就帶左我去買鞋，因為佢知邊間平，咁我就好信任佢咁就係果間睇…..點知一睇就俾我睇中一對，類似 boot 嘅鞋，係咩情況下都著得果種粗著嘅鞋。大約 $300 唔算太貴喇。
之後就同佢地兩個去打機，佢地去玩果隻問答遊戲嘅機，當然喇…..難唔到我，好多問題我都識答(笑)。接近 11:00pm 果下，我就去銅鑼灣喇，因為約左 Mandy。

去到銅鑼灣，初初都幾灰家，因為約左 Thomas 但又搵唔到佢，Mandy 又同 Turkey 行緊街街，結果我就係果度唔知做咩好…..好彩好快就搵到 Mandy，佢叫我唔好入維園住，係出面等住先，佢會同 Turkey 一齊出黎飲杯野先，因為佢行得好 tired，佢原本想話叫埋 Thomas 一齊嘅，咁我當然話唔好喇。不過 Thomas 又未到，所以佢就同我講，佢去仙踪林搵位先，搵到 call 我。不過跟住 Thomas 又 call 我，約我係世貿等。
咁我見到 Mandy 又未搵到位，所以就打算去世貿先嘅。就係呢個時候，竟然有一個我最意想不到最估唔到嘅人打電話俾我…….就係 Rebecca 喇，ha ha，真係超開心。原來佢打電話過黎同我講聲新年快樂，跟住又傾下佢嘅近況喇….都好似唔錯咁喇。
佢話想暑假返黎，不過唔知會唔會返得成喇，睇下佢搵到幾多 $ 先喇。
之後就搵 Thomas，點知我去到，搵黎搵去都搵唔到佢，咁 arm 呢個時候 Mandy 打電話黎，佢知道 Thomas 黎左，就約我係銅鑼灣廣場嘅仙踪林等，咁我就去喇……點知落到去地下，又俾 Thomas call 返我上去，我原本想叫去埋仙踪林等嘅，但佢話佢成班 fd 係度，無理由成班 fd 就我同 Mandy 兩個，所以就叫我上返去世貿搵佢先……
上到去…同佢講返個情況，其實依家我未約到 Mandy，只係我同佢係果度等，佢先肯放我走……話遲啲join 我地。
我去到目的地嘅時候，等埋位，入到去一個人坐係一張四人台…..都未見到有人影過到黎……….驚驚。好彩，無耐 Mandy 就過黎喇(佢好蝦碌咁，去錯地方，以為約左我係銅鑼灣地帶，hee hee)。咁我同佢一路傾一路飲野喇(不過話題都離唔開 Thomas 家喇)。
最後 Thomas 無黎到，因為我只係預左一張四人台，佢就一大班人坐唔到，所以我同 Mandy 就去世貿搵佢…..
去到後，就見到佢同佢班 fd 係度玩。Mandy 睇到咁嘅情況，就想走先，我同佢去維園先，遲啲佢再搵我地。不過當我同 Thomas 講呢句野嘅一刻，就即時見到佢好唔鐘意嘅樣。咁出到門口我同 Mandy 講返，佢見到 Thomas 唔鐘意，所以就算喇，係度等埋佢先……好彩佢都好快就走。
咁我地成班一齊行維園喇，不過一路行就見到 Thomas 一路俾「阿風」串，又見到其他唔識嘅人話 Thomas 好高，睇到 Mandy 好心痛……
雖然果度唔算話太多人，但係佢地行兩其中三行就話走喇(果度 Total 有 5 行)……搞到我無得睇添….
後尾佢地班人話去食野，咁我同 Mandy 決定唔跟佢地一齊，我送 Mandy 返屋企先。去到葵芳，已經 5:xx am 喇，我地就一齊去左葵芳嘅年宵市場睇野….不過果度已經關哂，所以乾貨嘅攤檔已經拆哂，只剩返啲唔要嘅花…..見到啲花都仲幾好嘅，但無人要，整到成地都係….好心痛….咁 Mandy 就羅左其中兩枝菊花返屋企。送完 Mandy 返屋企之後，先發覺 Mandy 買左嘅野仲係我度……好彩未搭車，即時上返佢屋企樓下俾返佢。
最後我就搭 46X 返屋企喇。

話時話，好耐都未試過咁開心嘅年三十晚喇，今日真係值得回憶嘅日子，hee hee。

P.S.1. Mandy 個細佬話睇過張貼紙相話我醜樣喎……ha ha，佢細佬真係好老實下，不過我已經接受左完全唔會介意….

P.S.2. Turkey 真係超級唔掂喇，追返個女朋友，不過竟然羅 Thomas 嘅野黎威歉佢，話俾伯母聽….好老實講，我聽到後都幾嬲下….容許我講一聲「人渣」……….之前對個女朋友唔好，依家追返喇，唔係應該對佢更好至係嘅咩?有咩可能咁威脅人呀…..佢根本就只係因為好勝心而追返 Mandy，所以依家追返後又唔識珍惜。唉…..真係影衰哂啲男人!!!!!

P.S.3 今日都仲幾凍下…..