呢個政改廣告不知所謂

政府今次軟銷政改爛方案好唔掂。
首先政府唔係阿媽，阿媽無得揀，但政府係人民授權，兩樣唔同既野。

其實呢套片既思維好似我以前中學讀過既一篇文章：

話說一座城俾山賊圍困，果個村長係一個好賢能既人。
佢有哂對抗山賊既策略，不過無同村民講過，只係同村民講搞得掂。
日子一日一日咁過，村內既糧食越黎越少，但個村長完全無表現出過做任何野，無任何解決方案。
最後村民瞞住村長，向山賊投降，但山賊入村後殺哂 d 村民。
幾日後，隔離村既村民黎到，見到條村已經變成廢墟了。
原來當日村長已經向左其他村求救，只要村民等左幾日就可以得救。

最後作者就蓋嘆民主唔係最好，人多既決定未必正確。
不過作者遺忘咗，係民主入主入面，有一個好重要既成份係資訊既流通，當初村民並唔知道幾日後會有救兵來，所以先會開城門。
當重要既資訊掌握係少數人手上，卻去批評其他沒有拿到這些資料就的人們所作的決定，是非常不公平。

好似今次呢個廣告咁，女兒從來都唔知阿媽整緊條衫 (其實就算整完都唔係個女設計果件衫，可以話貨不對版)
如果 Last Day 個女去左買件衫翻去既話，你可以怪責個女對阿媽「無信心」嗎?

今次個政改方案，俾我既感覺就好似清末民初賣豬仔咁，同你講美國遍地黃金，好多工作機會，但 D 人只係知道目的地係「美國」，但係「美國」係邊，點既樣咩都唔知，果陣既人「俾信心」後既結果如何，在此不作多述。
依家我地只係知 2017年普選特首、2018普選立法會，知道左「目的地」，但係「目的地」係唔係我地想像中咁，係唔係我地想要既野呢，完全唔講，亦無人知。

如果一個盡責既公民係要求有獨立既思考 (from 唐英年司長)，咁呢個咁既方案點叫我去接受呢?