記得以前本人對 yogurt 可以話 0 興趣。因為 yogurt 時常令我聯想起奶昔,而我忘不了細個時係太古城間麥記飲咗幾啖奶昔就嘔餐勁,所以一向對呢類奶類加工製品敬而遠之。
不過多得女友強烈介紹,數年前我開始會食 yogurt,由阿波羅嘅生果 yogurt 開始,慢慢接受。
近年 yogurt 鋪頭越開越多,而且低價 yogurt 成行成市,係登打士街 $20 已經可以買到一杯 so call 叫 yogurt 嘅「飲品」,因為杯 yogurt 稀得可憐,無咩 yogurt 味,一陣就變水喇,所以平嘢真係無好嘢。早排行經廣華街,見到一間 yogurt 無咩人(因為只係得店員係入面),但門口個待衛公仔幾得意所以去試,老實講價錢唔算太平,但亦唔會好貴嘅。

佢除咗一般嘅逐樣配料計錢外,亦有 4 款 preset 咗嘅 yogurt,有原味,芒果,綠茶 同埋 朱古力味,每款都係 $38。

第一次去試時試咗原味,今次試咗綠茶味。其實只有原味同芒果味係真係 yogurt,綠茶同埋朱古力味其實係雪榚嚟。

兩款味我都覺得 OK,但個人就鐘意原味多啲,因為真係 yogurt 嚟,帶點微酸而又有十分濃烈嘅 yogurt 味係真係好啱我胃口;而綠茶味都係水準之作,個人好鐘意飲綠茶,但對綠茶味嘅雪榚係十分挑剔,大部分綠茶雪榚我都係用「難食」去形容,就算再貴都未必好食 (實際用好食去形容只係試過兩次),而呢間用嘅綠茶雪榚就十分易入口,味道亦唔錯,水準真係 ok。睇返呢間 yogurt 係 open rice 評價都唔錯,但位置真係唔係咁好,比較靜 (雖然對面添好運好多人),附近都係啲賣槍嘅鋪頭,而係登打士街行過嚟亦有幾間賣 yogurt 嘅鋪頭,所以一般人好可能行到嚟之前已經買咗。

希望呢間鋪頭做得住,咁就可以多一個選擇。

店名:King N Cream

地址:旺角廣華街1號G23號舖 (添好運對面)

OpenRice:http://www.openrice.com/restaurant/sr2.htm?shopid=52192

King N Cream yogurt 01

King N Cream yogurt 02