【影評/觀後感】頗有迫力的《車手》

其實都無睇港產片合拍片一段時間，今次係因為睇預告覺得 ok，又有黃秋生份，不過最重要係 next meeting 係幾個鐘後，時間上剛剛好可以睇戲，唔駛係旺角呆等，所以揀咗呢套睇。

呢套警匪片主角係交通部，當然離唔開一位想出位英雄主義嘅年輕差人，而黃秋生演嘅就退休得過且過，但其實係身懷絕技，因意外留有陰影嘅差人都演得好好，好入戲，而且仲好型，哈哈。

呢套戲主要有三場追逐戰，金句係「8000轉2咪車」，係正常無可能轉到彎嘅窄位將架車打橫行，的確係幾神乎其技，不過老實講現實實用性係零，因為警察追人唔會得一架車，一前後包抄就玩完。

講完唔合理嘅地方，但佢鏡頭運用係唔錯，係幾有迫力，啲車左右穿插就撞咁，仲要唔係電腦特技，係好正。而且一幕係中環，金鐘嘅追逐戰，係近年少見（亦可能係我甚少睇港產片）。而呢套片同其他賽車片最大唔同係呢套唔係名車展，只係一啲十年車齡，但係拐彎靈巧。大家鬥嘅唔係只係速度，反而係匿藏，一去去到盡嘅擺脫追蹤技巧，另一方面追逐戰係以攔截，碰撞對方以令對失控為主。
不過想超車最重要係「唔好望住人哋尾燈，學識控制自己架車，唔好比人哋帶住走，行自己行嘅路」，余文樂最後都學識咗。不過呢套戲係鬥車片中算幾另類，導演都係想自己對自己講呢句嘢。

呢套戲幾實都幾 dump 本又難拍，誠意+本身質素值80分。