容祖兒number6演唱會

早排去睇容祖兒演唱會,老實說…….我完全忘記了,結果 9:00pm 飛的去紅磡,9:20pm 左右到場,大約 miss 左 20分鐘左右喇。
不過其實我買張飛係山頂最後一行,大約$150,但的士$$ 用左我 $85,心痛死我。
不過最令我心痛嘅係 — 根本唔好睇,更令到飛的嘅的士$$ 用得更冤枉。

其實唔係話佢唱得唔好聽,亦唔係話佢唔勤力,而係佢近年真係好少歌係真係好 heat,所以今次舊歌唱得少,新歌(即係近兩年既歌)唱得多,搞到我好多歌真係未聽過 / 聽過之前都覺得唔好聽;搞到我好悶,一路聽演唱會一路玩 Twitter 呻好悶,真係折墜。

不過個演唱會又唔係變得一無事處,我唔係睇得多演唱會果啲人,但呢個演唱會嘅舞台設計絕對係我睇過咁多個之中最好果個。
大量使用 LED 燈,多層多功能式舞台,不同的光影效果,絕對係好睇。
升降台的設計也非常有心思,連我都係咁估佢點落黎 (其實我係擔心昇左上去唔知容祖兒係邊度離開,好似變魔術咁,所以目不轉眼咁留意住 XDDDD)。

另一個賣點係舞蹈,排舞做得不錯;而且有不少火辣的舞步 (其實係香港人少見多怪,外國更火辣多倍),摸仿做愛般的動作。
另外有一 Part 係配合身後的 LED 圖案而設的舞,容祖兒的舞和身後的 LED 圖相呼應,但容祖兒係完全望唔到身後嘅影像,佢只係跟節拍去跳,效果出黎非常好呢,呢 Part 係全演唱會最精彩既地方。

容祖兒嘅歌喉不錯,不過最近真的無咩好聽嘅歌,所以搞到呢個演唱會失色不少,但因為只買左$150嘅飛,所以感覺還可以吧 (唔計的士 $$ 的話 /cry)