味精與增味劑

增味劑同味精的關係

增味劑，係一個統稱，佢係包括好多種唔同嘅物質，
當中比較常見嘅係味精同 I+G。
而味精更加係非常出名，而且好多都唔喜歡佢。

大家都係增味劑，點解味精會比 I+G 出名呢？
主要係因為味精係第一隻被人工提取同埋售賣嘅增味劑，
而且佢相對地平同易做。

味精係可以靠化學方法水解 gluten 提取，
但 I+G 以前 只係可以係肉到提取。
當然，到左今時今日可以透過基因改做嘅方法，利用細菌做製做 I+G 同味精。

味精，其實只係代表谷氨酸鈉。無味精，並唔等於無其他增味劑。
可以有 I+G（E631、E627、E635）、可以有一滴香（E637）呢啲嘢可能更加「毒」。
點解我話呢啲嘢可能更加「毒」呢？我所講嘅「毒」係咩意思呢？
其實呢啲 chemical，好多都唔係發展左好耐，
使用嘅年期唔長，發展無咁成熟，
對健康嘅影響，亦有更多未知之數。
相對於其他增味劑，
味精已經以增味劑嘅身份被使用左一百年左右（雖然 100 年其實都唔係好耐….-_-），
到而家都未發現佢會引起啲咩病果啲。
但係 I+G 只係有幾十年歷史。
雖然 I+G 一直都傳在係我地嘅食物之中，
但以基因改造的方法去提取出來的 I+G 會唔會對人有乜影響呢？
呢啲都係未知嘅。

好多人對「無味精」、「不添加味精」嘅嘢為之瘋狂，
但好多時，大家都無留意到呢啲嘢係有加到 I+G 或所謂嘅「水解植物蛋白」（水解植物蛋白係一樣更加更加更加有問題嘅嘢！下面再講！）。
而呢啲嘢對我地嘅身體可能更加差。

同埋，點解你會更加 prefer 無味精嘅嘢先？
如果係怕致癌、致病嘅原因的話，我覺得無必要。因為跟本就無 study 證明到！

點解我會對食濃湯寶、清雞湯咁反感呢？
因為我唔鍾意將啲 home-made 嘅嘢搞到咁濃味同埋咁 standard 嘅味。
大佬，打邊爐又呢啲味，燴意粉又係呢啲味，煮雞翼又係呢啲味，連煲個湯都係呢啲味。
呢啲味係乜嘢味？咪又係啲濃湯寶呀！雞粉呀！調味雞汁嘅味囉！

啲商人（即係出糧比我果啲）仲加埋啲增味劑，
好似驚你食得唔夠濃味咁。

當你食到咁濃味，一無左呢啲增味劑就會成日覺得啲嘢唔好味。
就好似啲細佬被工人由細照顧到大，結果小五都唔識自己抹pat pat咁樣。
一路食增味劑。當味精、I+G 呢啲嘢用到悶，用到你地都覺得唔再好味時，就再出啲新嘢。
比較新同比較少應用嘅就係乙基麥芽酚(E637)，即係「一滴香」。
呢樣嘢其實已經好普遍，我估好多嘢都有落，
但好多 food label 都無寫。